कंञ्चनपुर भाद्र २१ : नेपाल पर्यटन बोर्डको प्रमुख कार्यकारी अधिकृत (सीईओ)मा दीपकराज जोशी नियुक्त भएका छन् । बिहीबार बसेको पर्यटन बोर्ड सञ्चालक समितिको बैठकले अगामी ४ वर्षका लागि बोर्डकै पूर्वसीईओ जोशीलाई नियुक्त गरेको हो । बोर्डमा सीईओ नियुक्तिका लागि बोर्डका सदस्यद्वय मिलन देवकोटा र मदन आचार्य तथा पर्यटन मन्त्रालयकी सहसचिव इन्दु घिमिरेको एक उपसमितिले बोर्डको सीईओ छनोट गर्न तीन जनाको नाम छनोट गरेको हो । उपसमितिले सिफारिश गरेको तीन जनामध्येबाट बोर्डले जोशीलाई नियुक्त गरेको हो।
पर्यटन बोर्डमा गत माघ १६ गतेदेखि निवर्तमान सीईओ डा. धनन्जय रेग्मीको कार्यकाल सकिएपछि उक्त पद रिक्त छ । बोर्डको सीईओ छनोट उपसमितिले गत चैत २४ गते मागेको खुला आवेदनबाट सीईओका लागि योग्य उमेदवारमध्ये उत्कृष्ट ३ जनाको नाम छनोट गरेको थियो । उपसमितिले सोमबार प्रस्तुतीकरण र मंगलबार अन्तर्वार्ता लिएर बुधबार उत्कृष्ट ३ जनाको नाम छनोट गरेको हो । छनोट समितिमा बोर्डका निवर्तमान सीईओ डा. धनन्जय रेग्मी र पर्यटन विद् ज्ञानेश्वर महतोसँगै पूर्व सीइओ दीपकराज जोशीको नाम सिफारिस भएकोमा जोशी सीइओ नियुक्त भएको हो ।
बोर्डको सीईओको लागि बोर्डकै कर्मचारी श्रद्धा श्रेष्ठ, हिक्तसिंह ऐर, लक्ष्मण गौतम दीपक बस्ताकोटी, ठाकुरप्रसाद देवकोटा, विजय नेपाल, राजाराम गिरी, ज्ञानिन राई, नवीन पोखरेल, सूर्यबहादुर घिमिरे र सन्तोषविक्रम थापाले समेत प्रतिस्पर्धामा सहभागी भएका थिए ।
Be the first to comment